Sprema se izrada novog rovera za astronaute na Mjesecu: NASA je odabrala tri kompanije
NASA je odabrala tri kompanije, među kojima je i Intuitiv Mašins (Intuitive Machines) čiji je suosnivač milijarder Kam Gafarien (Kam Ghaffarian), za rad na razvoju rovera koji će astronautima pomoći istražiti Mjesec, objavili su čelnici agencije u srijedu. NASA se priprema da prvi put nakon nekoliko decenija vrati čovjeka na Mjesec.
Samo jedna kompanija dobiće ugovor za izgradnju vozila za Mjesec, ali tri kompanije – Intuitiv, Kunar Autpost (Lunar Outpost) i Venčuri Astrolab (Venturi Astrolab) – dobiće ugovore za kompetitivne projekte kako bi NASA održala “dinamičnu konkurenciju” i “dobila najbolju vrijednost za vladu,” kaže Lara Kerni (Lara Kearney) iz NASA-e.
Iz Intuitiv Mašinsa u saopštenju navode da su dobili 30 miliona dolara za procjenu izvodljivosti usluga lunarnog terenskog vozila, ali niti Lunar Autpost ni Venčuri Astrolab nisu objavili koliko njihovi ugovori vrijede, iako iz Venčuri Astrolaba kažu da bi ukupna vrijednost ugovora mogla iznositi do 1,9 milijardi dolara.
Rover će tražiti vodu, led i druge resurse
Novi rover biće dizajniran kako bi pomogao astronautima NASA-inog programa Artemis da istraže Mjesec i “tražiti vodu, led i druge resurse na lunarnoj površini,” kažu iz NASA-e, a pomoći će “ljudima uspostaviti dugotrajnu prisutnost na drugom planetarnom tijelu prvi put.”
Novo vozilo biće dio misija programa Artemis čiji je cilj da na Mjesec dovede prvu ženu, prvu osobu koja nije bijelac i prvog međunarodnog partnera astronauta.
Maksimalna potencijalna vrijednost spojenih ugovora mogla bi iznositi 4,6 milijarde dolara, rekli su iz NASA-e.
Vozilo bi trebalo da na Mjesecu izdrži do 10 godina, da preveze dva astronauta i robotsku ruku, kao i da preživi ekstremne uslove na lunarnom južnom polu.
Iz NASA-e je ranije rečeno da se nadaju da će koristiti rover za operacije s posadom od lansiranja letjelice Artemis V koje se očekuje u 2029. godini.
Intuitiv Mašins nedavno je postala prva kompanija koja je uspjela sletjeti na Mjesec letjelicom kojom se upravlja privatno. Letjelica je prevozila nekoliko NASA-inih eksperimenata i komercijalnih informacija, što je dio NASA-inog programa za prenošenje tereta do Mjeseca. NASA je ranije sklapala ugovore sa svemirskim kompanijama čiji vlasnici su milijarderi, u sklopu šireg napora da ojača komercijalnu svemirsku industriju. Blu Oridžin (Blue Origin) Džefa Bezosa (Jeff Bezos) dobio je ugovor od preko 3 milijarde dolara za razvoj platforme za lunarno slijetanje za Artemis V, a dvije godine ranije je SpaceX Ilona Maska (Elon Musk dobio ugovor od 2,9 milijarde dolara za izgradnju letjelice za program Artemis.
Molly Bohannon, Forbes
This Billionaire-Backed Space Company Could Build The Next Moon Rover For NASA Astronauts
(Prevela: Nataša Belančić)